Президент парламенттик шайлоону 4-октябрда өткөрүү тууралуу жарлыкка кол койду
Президент Сооронбай Жээнбеков «Жогорку Кеңештин депутаттарын шайлоону дайындоо жөнүндө» жарлыкка кол койду. Жарлыкка ылайык, парламенттин VII чакырылышына депутаттарды шайлоо 4-октябрга дайындалды.
Шайлоо жана референдум өткөрүү боюнча борбордук комиссияга (Боршайком) шайлоону өлкө мыйзамдарына ылайык уюштуруу тапшырылды.
Өкмөткө шайлоону өткөрүш үчүн зарыл болгон финансы каражаттарын Боршайком бекиткен чыгымдардын сметасына ылайык бөлүп берүү жагы милдеттендирилди.
Башкы прокуратура шайлоону даярдоодо жана өткөрүүдө Конституциянын жана өлкө мыйзамдарынын сакталышын камсыз кылууга милдеттүү болот.
Жергиликтүү бийлик жетекчилерине шайлоого даярдык көрүүдө жана өткөрүүдө шайлоочулардын тизмелерин түзүү, тактоо, уюштуруучулук-техникалык маселелерди чечүү боюнча тиешелүү органдардын жана шайлоо комиссияларынын ишине көмөк көрсөтүү боюнча тапшырма берилди.
Быйыл коронавирус эпидемиясынан улам жарыяланган өзөчө кырдаалга байланыштуу 12-апрелге белгиленген жергиликтүү кеңештерге шайлоо өтпөй калган. Жогорку Кеңештин айрым депутаттары эки шайлоону чогуу өткөрүүнү сунуш кылышкан.
Боршайком парламенттик шайлоого даярдык көрүүнүн жана өткөрүүнүн графигин былтыр 17-октябрда жарыялап, бул иш-чара 4-октябрда өтөрүн билдирген. Мекеме шайлоону уюштурууга жана өткөрүүгө 560 миллион сом талап кылынарын маалымдаган.
Быйыл 30-июнда президент шайлоо босогосун жети пайызга чейин түшүрүү тууралуу мыйзамга кол койгон.
Азыркы, VI чакырылыштагы парламент 2015-жылдын октябрында шайланган. 120 орунга алты партия өтүп, КСДП фракциясына 38 мандат, «Республика – Ата Журтка» 28, «Кыргызстанга» 18, «Өнүгүү Прогресске» 13, «Бир Болго» 12 жана «Ата Мекенге» 11 орун тийген.
